ባጨለሙት ሰማይ
በገዙት ምድር ላይ
የክፋት ዘር ዘርተው
አንዱን ሐረግ ባንዱ እየጠመዘዙ
ዘመናት ተጓዙ
የቀመሩት ቀመር
የሸረቡት ሴራ ድንግዝግዝ ፈጠረ
አንዱ ግንድ ከሌላው ፍትጊያ ጀመረ
ሐገር ጽልመት ዋጣት
ጨለማ ነገሰ
ሌባው ተመችቶት የልቡ ደረሰ
ጨለማ ነው ብሎ እንዳሻው ሲጋልብ
ያሻውን ሲያደርግ
አንዱ አንዱን እንዲጥል ሲያፋትግ ሲያፋትግ
ከፍትጊያው መሃል እሳት ብልጭ አለ
ብርሃን ፈነጠቀ
እውነተኛው ጠላት ተለየ ታወቀ
በደም መስተፋቅር ሐረግ ተዋደደ
አንድነት ነገሰ ሰላም ተወለደ
የነፃነት ፋና ጮራ ፈነጠቀ
ሰውነት ከበረ ሰውነት ደመቀ
( ጉጉ) ኩኩ መለኮቴ
ፍርድ ተበደለ
ፍትህ ተጓደለ
አቤቱታ ሰሚ ቅን ፈራጅ ሰው ጠፋ
አህያው እያለ ዳውላው ተገፋ
ኩኩ መለኮቴ የብሶት ጩኸቴ
ፍርድ መማጸኛ በልጅ አንደበቴ
ዛሬ ሰሚን ቢያገኝ ላዚመው በርጅና
ካንቀላፉት መሃል ንቁ አይጠፋምና
ኩኩ ኩኩ ኩኩ
ኩኩ መለኮቴ
ጉርሻ ያነቀው ሰው
ዳግም አይበላም ወይ ?
ንገሩኝ በሞቴ
ያድነኛል ያለው መድሃኒት ቢያቆስለው
ባንድነት ፈርጆ
መድሃኒት ሁሉ መርዝ ብሎ ይላል ውይ ሰው?
ኩኩ ኩኩ ኩኩ
ኩኩ መለኮቴ
እሷ "ባጠፋችው"
በኔ ላከከችው
ያንተ ስፌት
ለኔ ያልኩት ሁሉ
አንዳንዱ እየሰፋ
ሌላ እየጠበበኝ
የሚሆነኝ ጠፍቶ
ይኸው ራቆቴን ነኝ
……………………………………
ልክ ማውቅ መስሎኝ
ምኞት ተከትዬ
ያንተን መልካም ፈቃድ
በስሜቴ ጥዬ
ይኸው አሁን ድረስ
ብቀድም ብሰፋ
ከዚህ ሁላ ምኞት
የሚሆነኝ ጠፋ
………………………………
ስለዚህ አባቴ
ፍቃድህ እውነት ነው
አንተው ጨርስልኝ
የኔ ምኞት ረዝሟል
ባንተ መልካም ፈቃድ
በልኬ ስፋልኝ
ከልዑል ሀይሌ
@getem
@getem
@lula_al_greeko
ሳያውቁ በስህተት.......
የ 28 ዓመታቱ አገዛዝ በጣም በሚገርም ሁኔታ ድምጽ አልባ አቢዮት ተካሂዶበት የተገለበጠና ያበቃለት ይመስላል።
በደም የተገኘ ስልጣን በደም ካልሆነ ከእጅ አይወጣም የሚለውን መፈክር ያፈረሰ ታላቅ ትግል ታላቅ ድል ይዞ መጥቷል ።
ነገር ግን በነዚያ ሁሉ ጊዜያት የተዘራው መርዝ በ አንዲት ጀንበር ይጠራል ማለት ባይቻልም የሚጠበቅ ጥቂት ለውጥ ግን መታየት አለበት።
በርግጥ ይህ ጥቂት ብዬ ያስቀመጥኩት ለውጥ ታላቅና ለሐገራችን ህልውና እና ለምንጠብቀው እድገት ወሳኝ መሰረት ነው።
ታዲያ ለምን ጥቂት ለውጥ አልክ ካላቹኝ ግን ምክንያቱም ይህ ለውጥ በዶክተር አብይ አህመድ እና በአመራራቸው ሊመጣ ስለማይችልና ይልቁንም ከያንዳዳችን ኢትዮጵያውያን ግለሰቦች የሚጠበቅ በመሆኑ ነው።
ይህ ለውጥ ምንድነው? ካልን ደግሞ ከዘረኝነት የፀዳ! አመለካከትን ማዳበር ነው።
ጠቅላይ ሚንስተር ዶክተር አብይ መንገዱን አሳይተውናል በዘር መርጠው ሳይሆን እያንዳንዱን ኢትዮጵያዊ ወደው አንድነትና ፍቅርን ሰብከዋል ።
ይህን ጥሪ አለመቀበል ግን ሳያውቁ በስህተት የነበረውን አፋኝ አገዛዝ እሳቤ ማራመድ ነው
ምክንያቱም ዓላማቸው አንድ እና አንድ የኢትዮጵያን ሕዝብ በዘርና በሐይማኖት እያጋጩ የስልጣን ጊዜን ማራዘምና ወንበራቸው ከተገፋ ህዝቡን ማጫረስ ስለሆነ።
ደስ የሚለው ግን ስልጣናቸው አብቅቷል ሕዝቡም አንድነትን መርጧል በዚ ሁሉ ሁኔታ ውስጥ ያለፈበትን ሀሳብ ለማራመድ ዘር እየጠቀሱ መሳደብና ልዩነትን ለመፍጠር መሞከር ያስገርማል ይህን የምታደርጉ ሰዎች ሳታውቁት ከሆነ ስህተት መሆኑን ተረዱ ሆን ብላቹ ከሆነ ግን ህዝብ አንድነትን መርጧልና አትልፉ ነን ብላቹ የምትለጥፉትንም ብሄር አታውቁትም አትወክሉትምም!!!!
✍✍ግስ✍✍
ሀ ን ከበ የለዪ ፊደል የቆጠሩ
አንድ ዓረፍተ ነገር ፈልገው ሊሰሩ
ሐገራችን ድሃ። ብለው ተናገሩ
ስህተታቸው ነዶኝ
ነገሩ ከንክኖኝ ታይቶኝ ግድፈታቸው
ቢታረሙ ብዬ ግስ አከልኩላቸው
ሐገራችን ድሃ ትነሳለች። ብዬ
ሐገራችን ይኸው ድሃ ቆመች። ብዬ
✍✍✍@1999 ✍✍✍
🌙☀🌞ይነጋል
ደማቂቱ ፀሐይ ከዓይን ተሰውራ ሰማዩ ቢዳምን
ምድር ጭጋግ ለብሳ የድቅድቅ ጨለማ ጽልመቱ ቢውጠን
ሂደቷ ነውና የማይለዋወጥ የጊዜ ቀመሯ
እንደመሸ አይቀርም ይነጋል ይታያል የብርሃን ጮራ 🌞
✍✍✍✍✍✍✍✍✍✍✍✍✍✍✍✍✍✍✍✍✍✍✍✍✍✍
ያለግዜው የተዘመረ !!!
ብላቴናው እና ሙሴ
ቴዲ አፍሮ ዘመን በማይሽረው ዜማ ያልገባቸውና ከህሊናቸው መታረቅ ያቃታቸው እንደሚሉት "ቁጣና አመጽ " ሳይሆን ፍቅርና ተግሳጽ ያዘለ ምክርን ጃ ያስተሰርያል ሲል
ህዝብ ልብ ከገባ እነሆ 13 ዓመታት ።
በግዜው ስልጣን ላይ የነበሩት ሰወች የመጡበትን ዓላማና ያለፉበትን መንገድ ረስተው ህዝብን ሲያስጨንቁና ሲያሸብሩ ህዝብም ልዪነቱ ውበት እንጂ መጥፊያው እንዳልሆነ በማመን በአንድነት "በመደመር" በሕብረትና በቅንጅት ሆ ብሎ የወጣበት ብዙ እልቂትም የነበረበት መሆኑ አይረሳም።
ብላቴናው ያኔ
በ17 መርፌ በጠቀመው ቁምጣ
ፀጉሩን ያጎፈረው ዙፋን ላይ ሲወጣ
እንዳምናው ባለቀን ያምናውን ከቀጣ
አዲስ ንጉስ እንጂ ለውጥ መቼ መጣ
ሲል ድምፁን ከፍ አደረገ
ብዙወች ይሄን ቃል እንደ ስድብ ያዩታል ነገር ግን ስድብ አይደለም ለ17 አመት ልብሳቸው በላያቸው እስኪያልቅ ለነፃነት የታገሉ ሰወች ዓላማቸውን ረስተው እንደ ቀድሞው አፋኝ ስለሆኑ እንዲነቁ ነበር ጥሪው
ለዛም ነው መደምደሚያው
ይቅር በለውና የበደለን ወቅሰህ
ምህረት አስተምረን አንድ አርገን መልሰህ
ጃ ያስተሰርያል
የሆነው
ይህ ብቻም አይደለም ብላቴናው
ኤሎሄ ኤሎሄ ላማ ሰበቅታኒ
ኧረ አይበቃም ወይ ኢትዮጵያዬ
ብሎ ሲፀልይና እጁን ወደላይ ሲያነሳ
ፈጣሪ የሕዝቡን እንባ አይቶ እንደሚመልስ በቃ ብሎ ያን የተመኘውን ሰላምና እርቅ እንደሚያመጣ አንድነታችንም እንደሚመለስ
ሙሉ እምነት ነበረው ለዚህም ነበር አሳይተው የነሱንን እርቅና ሰላም ባየ ጊዜ
አበባ አየሽ ወይ? ለምለም
አበባ አየህ ወይ? ለምለም
ብሎ ያዜመው
ዳግም ተጠምዝዘው ሰላሙን ባያደፈርሱት
የብላቴናው ዝማሬ ዘመኑን ጀመርነው ይኸው ታርቀን -------ለዓለም እንዳይለያየን ዘለዓለም ብሎ ማዜሙ ምነኛ ያማረ ነበር ? ነገር ግን ቢዘገይ እንጂ አልቀረምና ያ ያለግዜው የተዜመው ዜማ አሁን ላይ ከፍ ተደርጎ ይከፈት አበባ አየህ ወይ? አዎ እኔ አይቻለው ያውም ለምለም!!!!
አሁን የብላቴናው ፀሎት ተሰምቷል
ዘ-ፀሃት ለኢትዮጵያ ወደ ተስፋ ጉዞ
ባህሩን ሚያሻግር አንድ ሙሴን ይዞ
ቅርብ ነው አይርቅም የኢትዮጵያ ትንሳኤ
ባንድነት ከገባን የፍቅር ሱባኤ
ዶክተር አብይ የፀሎታችን ፍጻሜ እንዲሆንና ኢትዮጵያችንን ይዞ እንደሙሴ ወደፊት የሚሻገርበት ዘመን እንዲሆን ተመኘሁ
እናንትስ ? አበባ አየህ ወይ ?
አበባ አየሽ ወይ?
የዳህላኩም ህልማችን እውን ይሆናል ገና !!!!!!!!!
መሸ ደግሞ አምባ ልውጣ!
አምባ ወጥቼ እኩለ-ሌት ፤ ስለት ገብቼ በስሟ
ከርሞ ሰይጣን በሷ አስቶኝ፤ ልገላገል ከህመሟ
ጠበሏ አፋፍ በጨረቃ፤ ደጋግሜ፤ ማህሌት ቆሜ
ሆዴ ቃትቶ ባር ባር ብሎ፤እርቃኔን ከሷ ታድሜ
ደጀ ሰላሟን በአራት እግር፤ ተንበርክኬ ተሳልሜ
በስጋዬ እሚነደውን፤ በጸሎት ላቤ አጣጥሜ
እፎይ ብዬ አመስግኜ፤ ውዳሴዋን ደጋግሜ...
ገና ከደጅዋ እልፍ ሳልል፤ ደሞ ይምጣ የቁም ህልሜ?
ሌት በጥምቀቷ የነጣው፤ ነጋ፤ ደፈረሰ ደሜ።
ለሷ እንጂ ለኔ አልያዘልኝ፤ አዬ የስለት አታምጣ!
በውጣ ውረድ በጠበል፤ ባሣር ወዜ ቢገረጣ
ልክፍቷ እንደሁ አልለቀቀኝ፤ መሸ ደሞ አምባ ልውጣ!
ሎሬት ጸጋዬ ገ/መድሀን፣ እሳት ወይ አበባ!
እግር አንፈራጦ
እጅ አጥፎ ተቀምጦ
ከቶ ምን ሊመጣ ምን ከምን ተገኝቶ
አውጣኝ ያለ ወጣ አብላኝ ያለም በላ
ተኝቶ የዋለ አሳማ ተበላ
ቢሆንም ብሂሉ
ወዲ እኮ ነው ቅሉ
አብላኝ ያለ አንበሳ
ለአደን ተነሳ
ጫካውን አሰሰ
የድካሙን ዋጋ ፍሬውን አፈሰ
አውጣኝ ያለ ፈረስ
ጠላት ከሱ እንዳይደረስ
ሮጠ ፈረጠጠ
በጠንካራ እግሮቹ
ከመጣበት መቅሰፍት ጥፋት አመለጠ
ስንፍና ተጭኖት የተኛው አሳማ
የጠላትን መድረስ በፍፁም ሳይሰማ
ሩቅ እንደተመኘ እሩቅ እንዳለመ
ጥቂት ሳይራመድ በሞት ተቀደመ
እናም
ይህ ነው ሕይወት ቅሉ
እሩጡ ውጡ እንጂ አውጣን አትበሉ
Samson mekonnen
ያኔ በዝቶ ግቷ
ምን ቢሞላ ጡቷ
ጊዜ በመጥፋቱ
ባከነ ወተቱ
ዛሬ ግዜ አግኝቼ
ማለቢያ አንግቼ
እምቢ አለኝ ወተቷ
ነጥፋለች ላሚቷ
አወይ ጥበብ ከንቱ
አወይ ብዕር ከንቱ
በጊዜው ካልያዙት ያሳዝናል ሞቱ።
ሳምሶን መኮንን
እቱ የጥንቲቱ
የጥርስሽ ንጣቱ
የጉንጭሽ ቅላቱ
ውል ይለኛል ዛሬም የገላሽ ሙቀቱ
የእግሮችሽ ኮሽታ
የፍቅርሽ ሹክሹክታ
ያ የሣቅሽ ዜማ የበዛው ክትክታ
ይሠማኛል ዛሬም ናፍቆት ሲበረታ
እቱ የጥንቲቱ
አንቺም ትዝ ካለሽ ካለብሽ ናፍቆቱ
ይህ ነው መዳኒቱ
ባስለመድኩሽ ሰዓት ባለሽበት ቦታ
ቀና በይ ላንድ አፍታ
እኔም ባለሁበት ባስለመድሽኝ ሰዓት
ዓይኖቼን አቅንቼ
ጨረቃን አይቼ ልግባ ተፅናንቼ
አንቺም በዚያች አፍታ
ጨረቃዋን ፈክታ
ካየሻት ተጽናኚ
በይ ቃሌን እመኚ
ምንም ብንራራቅ ካንድ ሰማይ ሥር ነን
ነገ አብረን ለመኖር ታላቅ ተሥፋ አለን
እንቆቅልሽ
አንድ ሰው ተራበ
እጆቹን ታጠበ
መዓድ አቀረበ
የገበታው ዓይነት መዓዛው ቢያውድም
ለተራበ ስጋው ያቀረበው ሁሉ ምን በቂ ቢሆንም
ዕትኡ በሰላም እስኪባል አልበላም
እንቆቅልሽ
ሌላውም ተርቦ
እጆቹን ተጣጥቦ
ማዕዱን አቅርቦ
ካማረ ገበታው ካረደው ፍሪዳ ከጠላ ከጠጁ
ሊጠጣ ሊበላ ቢዘረጋም እጁ
ፍላጎት ግን ከዳው
በድኑን አስቀምጦ መንፈሱ ግዜ አጣ ሐሳብ
አነጎድው
እንቆቅልሽ
አንድም ከዚ አለ
ተርቦ የዋለ
ምን ርሃብ ቢሰማው ቢጨማደድ ፊቱ
ምን ቢጮህም ወስፋቱ
እጁን አይታጠብ
ማዕዱን አያቀርብ
ጥግ ይዞ ተቀምጧል
በደከሙ ዓይኖቹ ህዝቡን ያማትራል
እንቆቅልሽ
አማኝ ነብሱን ብሎ
ሐብታሙ ሲጨነቅ
ድሃው ግን በማጣት
ሶስት ሰወች ተራቡ ዓለም እንደዚ ናት
እንቆቅልሽ ህይወት እንቆቅልሽ ዓለም
ከጥያቄ በቀር ምን ጊዜም መልስ የለም!!!!!!!
